كنافه بالمنجاااا

كنافه بالمنجاااا

انا مش هحط مقادير محدده  

انت و تقديرك هى بسيطه مش مستاهله

  

استخدمت حوالى  نص كيلو كنافه بس لانى عملتها رفيعه و معلقتين كبار سمنه  و سيحتها بس مش سخنه

حطيط الكنافه فى الكبه و ضربتها ضربات خفيفه و بعدين ضفت معلقتين سمنه سايحه و ضربت ضربتين كمان يتوزعو ا

تفرديهم فى الصينيه بالتساوى

 و تضغطى عليهم بايدك جامد و تدوسى اوى فى كل مكان وتدخليهم الفرن حوالى 10 دقايق لو الوش محمرش كويس افتحى الشوايه

ده العسل 2كوب سكر على  2 كوب ماء عشان يكون تقيل و حطيت معاهم قرفه و الاعواد تكون افضل و قرنفل و حبهان 

التوابل دى بتدى  طعم خفيف بس مميز و بتفرق

 

ده شكلها و نفس الشكل من تحت و عملت من دى اتنين 

دى مهلبيه 1 ك لبن و معلقتين كبار سكر و معلقه كبيره نشا ندوبهم سوا و نرفعهم على النار لما تتقل نبردهم انا حطيت عليهم بلاستيك عشان متعملش قشره 

ضربت المهلبيه بالمضرب

 و كنت ضاربه كريم جانتيه و بنضيف المهلبيه عليه و نخلط خفيف بالمعلقه او سباتولا براحه لحد ما نوصل للقوام اللى نختاره

و ممكن منستخدمش المهلبيه كلها

بس دى افضل تركيبه لانهم بيكملو بعض افضل من لو اختارنا واحد فيهم

 

حطيط خليط المهلبيه و الكريم شانتيه و قطع المنجا  و لو سالتونى نقف عند المرحله دى احسن  حتى شكلها كده عجبنى اكتر انا مكترتش مانجا عشان خفت متعجبهمش 

فى نقطه مهمه ندوق المانجا قبل التقطيع و نتاكد ان طعمها مسكر ومش مزز و الا مش هتكون حلوة مع الكريمه و طعم السكر و العسل 

بس اللى انا عملته انى حطيت فوقها الكنافه التانيه

 و زينتها

كانت طعمها حكايه و عجبت الكل 

و تقطيعها مكنش صعب ابدا لانها رفيعه و مقرمشه و مخدتش وقت خالص

 

بعد ما عملتها دقتها من قويدر و الفرق كان التالى

1 الكنافه مكنش عاملها فى صينيه   كان محمرها و هى زى ما هى يا دوب حط عليها السمن و بس يعنى كانت منعكشه زى الشعريه كده و  حاطط عليها عسل و لو هتحمروها فى الفرن يبقى لازم تقلبوها كل شويه و ممكن على البوتاجازفوق مع التقليب برضو

  

 

تانى حاجه كان مستخدم كريمه لبانى فكانت تقيله زى القشطه بس مش وحشه و سكرها مزبوط(طعمها اقرب للجبنه الكريمى زى كيرى كده )

اخر حاجه كان حاطتها طبقات زى الترايفل  يعنى طبقه مانجا  طبقه كريمه  طبقه حلوه كنافه و هكذا

انا حبيت اقولكم عليها عشان لو حبيتو تعملوها زيهم هتكون لطيفه برضه بس الكريمه يفضل كريم شانتيه بالمهلبيه او بالكريم باسترى  لانه اخف من الكريمه اللبانى

دى بتاعتى و هنزلكم اشكال تانيه من النت عشان تبدعوا

و ممكن نعملها فى صينيه الكاب و هتكون حلوة برضه

 اتمنى تكون عجبتكو و ميرسى كتير لزيارتكو .

تفصيل شنطه زى الجاهزه بسهوله

السلام عليكم 

 دى صوره الشنطه اللى هنعملها انهارده

و هى سهله اوى و عملتها فى وقت قصير كمان

بس الصور كتيير لانى شارحه بالتفصيل المملل جدا

يعنى مش هتفوتكو حاجه

  القماشه كانت بواقى جيبه اختى عملتها 

نوع القماش ده جبردين يعنى تقيله شويه و انا تقلتها اكتر

 طبعا لما اشتغلت بتبقى فى دماغى افكار كتير و بتتغير و انا شغاله حسب الانسب لكن انا زى ما شايفين لفيت القماشه على بعضها ودبستها بدبابيس خياطه  و حطيط جواها اكياس مكرمشه عشان اشوف هتنفع القماشه تبقى شنطه ولا لا و هتدينى حجم كبير ولا ايه

و لقيتها مناسبه بس محتاجه تتقل شويه يعنى القماشه رخوه سنه

 قصيت القماشه 2 قطعه كبيره  للامام و الخلف

2 قطعه صغيره للجناب 

قطعه واحده للقاعده

 زى ما مترتبين فى الصوره و انت بتختارى مقاساتك 

بس المهم القاعده طولها = عرض القطعه الكبيره

و عرضها = عرض قطعه الجناب  و يا ريت تقصيها فى الاخر لما تحتاجي تركبيها زى ما عملت لان اللى فى الصوره فوق كانت قماشه زياده حطتها عشان تفهمو الفكره

و طبعا بنسيب من كل جنب 2 سم خياطه

 انا جبت قماش لف هدايا تقيل و خفيف اكمل بيه الشنطه

 حطيت كل قطعه من الشنطه على القماش و قصيت قدها

 حطيت الجناب على قطعه من الكبار عشان اخيطهم فى بعض و دبستهم و خيطهم

 و بقى الشكل كده جبت القطعه الكبيره التانيه  و برضو دبستها و خيطها

 و ده شكلها النهائى

 و ده و هى مقلوبه انا طبعا عملت الحروف كلها  زجزاج عشان متنسلش

فردت الشنطه و خليت الجناب هى اللى قدامى و علمت مكان هعمل فيه كشكشه بسيطه عشان تدى وسع من جوه للشنطه من غير ما يكون شكلها كبييير اوى من بره

 و جربت اكشكش بمكنه الخياطه على اوسع غرزة بس برضو منفعش عشان القماش تقيل على خيط المكنه

 فكشكشتها سراجه بابره و خيط

 و قيست السراجه قبل و بعد عشان اعمل الناحيه التانيه

 و خيطت بالمكنه عشان الشكل يثبت

 شايفين شكلها بعد الكشكشه من الجناب فوق فى الصوره

طيب

دلوقتى قيست القاعده اللى انا محتاجاها و شفت شكلها و قصيت على اد الشنطه من تحت

 دورت الزوايه بالبلاستر او طبق شوربه اى دايره متاحه  و قصيت بزياده للخياطه 2سم و قصيت معاها قماش الهدايا

بس خليتو دبل اتنين يعنى عشان تبقى متماسكه اكتر لانها اللى هتقف عليها الشنطه

 و ركبتها زى ما بنركب الكم كده علمت نصها و حطيته مع نص الجناب عشان تيجى مظبوطه من الناحيتين و بسرج و بعدين اخيط

 و ده شكلها بعد ما وقفت على حيلها

 طيب دى بقى انا نزلت عند الخردواتى وحددتلو مكان الاخرام دى و هو عملها

هو المفروض الاخرام دى بيعملوها للستاير تقريبا

 عامتا لو ملقتين حد بيعملها اعمليها عروة زى بتاعت الزراير و دى انا هطلع منها حبال الجناب

 علمت المكان اللى هخيط فيه الحبل من كل ناحيه

 و شفت لما هتنى الحرف هتبقى الخياطه فين

 دخلت الحبل طرف من كل خرم

 و هنا خيطت الاطراف و دى شكل الخياطه من بره و لما اتنى هتبقى جوة

 و هنا خيطت التانيه و زى ما شيفين نراعى ان الحبل يكون بعيد عن الابره و ميتخيطش مع القماش

 الباقى من القماش عملتو ايدين الشنطه و دى كانت نقله فى خبرتى عشان كنت دايما بعمل شنط و متعجبنيش ايدها اوى او ملقيش ايدين جلد مثلا عشان تبقى حلوة 

لكن دى عجبتنى بعد ما عملتها و لقيتها لايقه و ظريفه

 لما قطعت القماش قيست عرض اليد مرتين وش و ظهر  و سبت مساحه صغيره للخياطه و قصيت القماش بالطول كلو

و شفت المقاس لقيت ايد هتطلع كامله و ايد فيها خياطه من النص بس معملتش مشكله

و جبت قماش الهدايا و طبقت بنفس مقاس عرض اليد و حشيت بيه و انا بخيط اليد او حزام الشنطه وكانت سهله 

و ممكن تكوى القماش قبل الخياطه او تسرجيه لو لقتيها صعبه عليكى 

بس هى فعلا كانت سهله اوى

 و ده شكله بصو متين و لطيف ازاى كانوو جاهز

 و دى الخياطه اللى قلت عليها برضو مش باينه خالص

 حاولت على قد ما قدرت اخلى الاطراف مدوره لانها هتبان

و لو سرجت كانت هتبقى احسن لكن انتو سرجو عشان تظبط اكتر

 دبست السوسته و ركبتها و ركبت الايدين و لقيت عندى زراير لطيفه خيطها فيها

 دى بقى البطانه الداخليه

و دى سهله اوى انا عملت قماش هدايا و شفتو اصلا فى شنط جاهزة برضو لكن ممكن اى قماش خفيف

 انا عملت جيب كبير و خيطه و قسمته بالخياطه جيب كبير للفكه او مفاتيح و الصغير للموبايل بدل ما ادوخ فى التدوير عليهم

هنا بقى عملت قاعده للبطانه

 بفرد الزاويه اللى تحت بالعكس  و انتم هتعرفوها ازاى من شكل الخياطه و ادخل حوالى 4 سم  و اخيط

 عشان لما اقلبها تبقى ليها قاعده بالشكل ده

-+ طبعا لما نخيطها نراعى ان الوش اللى هيبان لنا 

احنا بنحطها عشان ندارى شكل خياطه الشنطه  فمن البديهى ندارى خياطته  البطانه

 و اخيرا وصلنا للشكل النهائى بعد تركيب كل حاجه

 متهيالى فهمتو فكره الحبال دلوقتى

 عارفه انى طولت عليكو اوى و الصور كتير بس كنت حابه اشرح بالتفصيل المممل اوى عشان تتشجعو و تعملوها 

هى بجد سهله و نتيجتها حلوة و لما اقول لحد انا اللى عملاها ميصدقش 

جربو بامانه مش هتندمو

سلام