قشر البرتقال المكرمل
السلام عليكم و رحمه الله و بركاته
الوصفه دى بحبها كتير لانها بتنفعنى اوى
المقادير
قشر 3 برتقال مقطع رفيع
4 معالق كبيره سكر
1 ك ماء
و فى الاغلب المقادير تقديريه بالعين اى ذياده او نقص مش هتفرق خالص
اول حاجه هنغلى ميه على النار و لما تغلى نحط قشر البرتقال و نسيبه بالظبط دقيقه يعنى نعد لعشره و نصفيه على طول و دى سهله انا مصورتهاش
نحط السكر و الماء لوحدهم نرفعهم على النار ولما يدوبو نحط قشر البرتقال و نسيبهم يغلو حتى ما يبقى القشر شفاف شويه
و نسيبهم يغلو حتى ما يبقى القشر شفاف شويه
غلوتين بس مش بنكرمله على الاخر
لو غليناه اكتر السكر هيكرمل حواليه اكتر و هيبقى كده زى الفواكه المسكره و بيكون لذيذ اوى لو كلناه كده بس تقلبه عشان ميتحرقش من تحت و لو غلوتين و السكر بسيط بيكون كده يادوب يسحب المراره و يدى طعم حلو
بقطعو قطع و احطو مع كيك الشاى العادى بيكون تحفه
زى القطع اللى فى كيك مونجينى
بحفظو فى التلاجه شهر او فى الفريزر شهور و يفضل فريزر على طول هو مبيجمدش اوى
دى صور انا استخدمتو فيهم للتزين
تورته جيلى
ايس كريم
و زينت بيه فى نص التورته
و اللى جاى صور من النت رغم انو اختراعى لقيتو مشهور
