تغير شكل دهان الحائط

تغير شكل دهان الحائط

الفكره شفتها على موقع و عجبتنى و عملتها زى ما شفتها من غير تغير لكن انتم ممكن تغيرو طبعا

زى ما هنشوف انا شفيت الرسمه من على شاشه الجهاز و  طبقتها اربع تربع و قصيت 

و رجعت رسمتها على كرتون بيتزا قديم و قصيته برضو

يفضل نحط ميزان مياه عشان الرسم يظبط اكتر لكن انا مستعملتوش و مشى الحال

وضعت الكرتون على الحيط و حددت  حواليه و انقله و احدد تانى لحد ما خلصت الحيط كلو

ده اللون اشتريته جاهز من عند الحدايد و البويات

جربت الاول الرسم بالفرشه على الجرنال و مكنتش لطيفه فاخترت فرشه اصغر و انعم و كانت كويسه اوى

و دى نتيجتى

 

و دى نتيجه البنت من الموقع الاخر

و ده الشكل للى عايز يطبعه او يشفه برضو

و دى اشكال لحروف برضو شفتها و فرغتها بالكتر على استنسل

و دهنت عليها

ان شاء الله يكون الموضوع عجبكم 

و بجد جربو سهله اوى ومخدتش وقت كبير

قرع العسل

قرع العسل بالبشاميل

دى وصفه يا جماعه طعمها تحفه اوى اوى اوى 

انا مش هتكلم عنها كتير

الوصفه مش محتاجه مقادير اوى على حسب ما انت عايزه تزودى ايه و تنقصى ايه
 

اول حاجه هنقشر القرع و نشيل اللب وكل حاجه جواه و نقطعه مكعبات زى الشمام بالظبط بس هو اجمد كتير 

هنحط معاه ربع كوب ماء  و كوب و نص سكر على حسب ما تحبى السكر و نسيبهم يغلو ربع ساعه كده

زى ما شايفين لما يستوى هيبقى طرى خالص

هنصفيه كويس و نضغط عليه و ننزل كل ميته او العسل بتاعو

زى ما شايفين بينزل ميه كتير

نيجى للبشاميل

معروف ان الدقيق و السمن لما يتخلطو عشان يعملو بشاميل بيكون اسمهم الرو << انجليزى ده يا مرسى

المهم ان المفروض عشان البشاميل يظبط لازم الرو يكون متوسط يعنى لا تقيل ولا خفيف

يعنى باختصار يكون الدقيق قد السمنه

لانه لو الرو تقيل هيكون البشاميل تقيل و لو خفيف مهما غليتى فيه او كنتى مكتره دقيق هيطلع برضو خفيف

 يعنى ده تقيل اوى و مهما كترتى لبن اول ما يغلى هيكون شكله كده برده تقييل

 

و ده خفيف اوى

الصح يكون شكله كده او لو حبيتى تخففيه سنه انت وزوقك

هنستنى لما يغير لون بسيط اوى نرفعه من على النار و نكون مجهزين اللبن و العسل

و نضيف كوبايه من عسل القرع

نقلب كويس و نضيف كوب كمان

انا حطيت اتنين كوب عسل

و بعدين نضيف اللبن كوب كوب برضو ونقلب

انا حطيت 3 كوب لبن

زى ما شايفين لما نحط السوايل كوب كوب مش بيكلكع خالص  و بيكون كريمى جدا 

و دى نفس الطريقهه اللى بستخدمها فى المكرونه بس بخففه اكتر و بستخدم لبن بس

ارجعه على النار و اقلب لحد ما يغلى

فرمت المكسرات وجوز الهند و قطعت مشمش مجفف 

مبحبش اضيف زبيب

ممكن نكتفى بالمكسرات اوممكن بالفول السودانى بس

حطيت القرع والمكسرات و كبشه باشاميل

و نقلب خفيف تقليبه سريعه مش نعجن

 نفرده فى صينيه مش مدهونه خالص

و نحط على الوش باقى البشاميل 

بصو البشاميل كريمى ازاى بالظبط زى ما كنت عامله الرو

فى ناس على فكره تحب تعمله طبقات

يعنى طبقه قرع بس تفرده بعدين طبقه المكسرات  واخرطبقه البشاميل 

نفرد البشاميل و ندخله الفرن  على فرن متوسط لحد ما يحمر الوش بسيط

لما يخرج نسيبه يبرد خالص و ندخله التلاجه يسقع شويه

احنا بنحبه تانى يوم يبقى بارد و لذيذ اوى

بيكون ماسك نفسه و سهل التقطيع  و على فكره هو سهل اوى

و بالهنا و الشفا يا رب تجربوه ...