سيزر سلاط على طريقتى

سيزر سلاط على طريقتى

السلام عليكم

طبعا طبعا هى مختلفه كتير عن سيزر سلاط الاصليه  بس طعمها قوى جدا و تحفه

 المقادير 

فراخ بانيه

بطاطس مكعبات مسلوقه

خس افرنجى 

مكونات السلطه البلدى العاديه 

طماطم فلفل خيار لمون بقدونس

فصين توم

و دقيق اسمر

نقطع السلطه  و نجهز التوم و الفلفل نفرمهم يعنى

 نغلف الفراخ بالدقيق الاسمر  من غير بيض او اى حاجه خالص

و ممكن بس ننقعها بشويه لبن متبل بالتوابل اللى نحبها

زى ما شايفين انا بحب احط الدقيق فى كيس و افتحه من الجنب بيبقى اسهل فى الاستعمال و مش ببهدل ايدى ولا المكان و سهل اجمع الدقيق فى النص بسهوله

 

شايفين انا حاطه زيت قليل جدا جدا معلقتين بس و نشوحها بسيط لحد ما تستوى على نار هاديه اوى

 على فكره اول ما نحطها هتلزق على طول و بعد شويه لما تستوى من تحت هتتحرك عادى بس سيبوها لما تستوى عشان قشره الدقيق خفيفه و ممكن تنفصل لو عاملناها بعنف

 لما استوت قلبتها  بتاخد 5 دقايق بس لكل وش

 فى نفس الطاسه ضفت معلقه زيت كمان او زبده  و بعدين التوم و الفلفل

 تحميره بسيطه ومننساش الطاسه سخنه و نضيف البطاطس و نشوحها 10 دقايق و احنا بنقطع الفراخ

 نضيف الفراخ و نقلب عشان تاخد طعم التوم و نحط توابل و ملح

نفك اوراق الخس على شكله  نتبل السلطه بالملح و الليمونو نقلب و نحط فى كل ورقه خس معلقه سلطه

نوزع فوقه الفراخ و البطاطس

 و ممكن نحط فوق توست محمص انا عن نفسى بحط عيش سن عشان الرجيم

نصيحه بقى

1. ممكن الفراخ نشويها او اى فراخ باقيه عندنا مسلوقه مشويه مقليه نفصصها و نحطها مع البطاطس على النار 
2. نحط اليمون والملح اخر حاجه على السلطه عشان متنزلش مياه الخضار
3. نجمع الخس و السلطه و الفراخ قبل التقديم على طول و مش ضرورى تكون الفراخ سخنه دى سلطه 

 على فكره دى وجبه كامله و بتشبع اوى و طعمها تحفه 

تنفع غداء كامل او عشا و مناسبه اوى للرجيم و ممكن سلق الفراخ من غير جلد

سلااااام

لوحه من رول المناديل

لوحه من رول المناديل

السلام عليكم و رحمه الله و بركاتة

 الادوات    

مقص رول مناديل كرتونه مربعه و غلفتها بورق ابيض مشابك او بنس و غراء ابيض

 نقص الرول لدوائر عرضها2 سم

 نلونها ونختار تصميم يعجبنا و نجمعهم ونلزقهم

و ممكن نسبتهم بالمشابيك او بنس الشعر لحد ما ينشفو تماما ثم نلزق التصميم على الكرتون المغلف بورق ابيض و بعد ما تنشف نكمل التصميم

انا هنا رسمت بقلم منحنيات و اشكال عشان املا الاماكن الفاضيه و لزقت فصوص كرستال خلت الشكل اجمل و بتلمع اوى فى النور الاصفر

و ده الشكل النهائى

اتمنى تدعولى بالصحه و الهدايه و سلااام

وحده اضائه ورق

وحده اضائه ورق

 السلام عليكم و رحمه الله و بركاته

دى نجفه عملتها لاوضة الاولاد و مكلفتنيش ولا تعبتنيش خالص

الادوات  ورق كلك و هو اقوى و انشف من ورق الشفاف شويه قلم مقص خيط و اى حاجه مدوره نرسم بيها انا اخترت رول مناديل التواليت

اى جزء سلك مدور او مربع ينفع للعمل 

انا اخترت شئ بنحطه كده على البوتاجاز الصغير عشان يشيل الحلل و كده 

فى ناس ممكن تختار الشبك الامامى من المروحه  القديمه طبعا

الطريقه

 نرسم الدواير

 نقص و ممكن نتنى الورق وبعدين نرسم و نقصهم مجموعات

 نخيط الدواير فى بعض

 انا عملتها صفين بس 

الصف الاول خمس دواير مع بعض و التانى سبعه و كل واحد حسب التصميم و حجمه

 و اخر مرحله نركب

فى الاخر جبت غراء ابيض او اى  نوع لزق  و حطيه فى علبه قطره او ابره من غير سن و حطيت نقطه فوق كل ربطه فتله عشان تكون امتن و متتحركش 

و ده الشكل النهائى

ملاحظه اخيره
فى الاول فكرت انى اعملها من علب البلاستيك البيضه عشان تكون امتن و تعيش
و بعد ما ايدى هلكت فى قص زجاجه واحده
اكتشفت انها مش حلوة ناشفه و معوجه على شكل الزجاجه  و حدودها مش مزبوطه و محتاجه زجاج كتير

و ده الفرق ما بينهم 
و كده او كده هى متعلقه فوق يعنى مش هتتبهدل كتير و اقل تنضيف هيشيل الغبار 
جربوها بجد حلوة فى شكلها و مش متعبه ولا مكلفه ابدا 
و اخيرا سلاااام

شنطتى بتطريز يدوى

شنطتى بتطريز يدوى

السلام عليكم ورحمة الله و بركاته

دى بعض الشنط اللى فصلتها و طرزتها بايدى يا رب تعجبكو

 نبتدى بالصور

الشنط دى كلها بغرزة واحده تقريبا و هى غرزة بسيطه جدا جدا و اغلبنا خدها فى المدرسه و احنا صغيرين و هى السلسله

و دى صوره من النت لشكلها و طريقتها

  الخيوط اللى بستخدمها مش كتير

اللى انا بفضلو و بلاقيه فى السوق

دى خيوط قطن ساده او ملونه جانجا سعرها كتير بسيط الصغيره ب جنيه

 و الكبار فى الصوره الاولى خالص  ب5 ج  و ممكن يتعمل منها مفارش الكروشيه  و اللاسيه اللى زى الدانتيل دى

 دى خيوط حرير  بتتباع بالكيلو تقريبا ب35 او اكتر شويه او اقل  بس محلات كتير بتقسمها  او تقدرو تشترو تمن كيلو 

عامتا الواحده من اللى فوق دول تمن كيلو و انا بشتريها من الخردواتى ب 2.5  و هو بيبقى مقسمهم  المهم انكو لما تيجو تستعملوها لازم الاول تلفوها على كرتونه مثلا لانها ناعمه اوى اوى و ممكن تتلبك بسهوله عشان بتزحلق 

 

متستغربوش عارفه ان دى خيوط زى اللى فى كل بيوتنا بس انا بستعملها و بتبقى تحفه بجد و بتدينى النتيجه اللى انا عايزاها و لان التطريز بيستهلك خيوط برضو فدى ارخص وسيله و افضلهم للى عايزين زى مينزلوش كتير  و يستعملو من الحاجات المتاحه حواليهم 

عامتا انا بخيلى الخيط فى الابره مجوز و ممكن ادخل فى الابره لحد 6 خيوط

و ممكن اكتر لكن بعد كده هتبقى متعبه فى الشغل شويه عشان المفروض ان يبقى فى تناسب بين الابره و الخيط و لما تشتغلو هتفهمو اكتر

و دى الخيوط اللى انا جمعتهم و لفتها و هى اربع خيوط مع بعض و انا بعمل مقاس طويل و الفه و اخد منه على طول افضل من انى كل شويه اجمع اربع خيوط 

يعنى الشنطه دى مثلا كلها خيوط قطن ساده صغيره اما الون الازرق البترولى من بكره خياطه عاديه

و مجمعه اربع خيوط برضه و كمان الكويس فيها انى ممكن فى التصاميم الدقيقه فى الرسمه اعملهم بعدد فتل اقل فتبان اصغر و تظبط الشكل

وصلنا لاخر حاجه و هى التصاميم و هى مش من دماغى كلها 

دى التصاميم اللى استوحيت منها الشنطه دى و الباقى من دماغى على حسب الذوق و زى ما شايفين انا مش واخده التصميم بالكاربون لا اخدت اللى يعجبنى منو بس

و دى كمان بتاعت الشنطه التانيه و على فكره دى اختى اللى عملتها انا بس اخترت الالوان و رسمتلها الرسمه و هى اللى طرزتها كلها و ماشاء الله خلصتها فى ساعه مع انها اول شغل ليها و ده اللى عرفنى انى بطيئه شويه و كانت زى ما شايفين متقنه اوى و ربطت الالوان بشكل حلو مع بعض

دى كانت تصميمى بقى  

اما عن ازاى بنقل التصاميم

على الاقمشه الفاتحه بحط كربون و ارسم فوقه

و فى الاقمشه الغامقه بخرم التصميم على الورق و احط من فوقه بودره زى بودره تلك او مارك مبشور مثلاو اول ما اشيل الورقه استخدم اى مارك او قلم رصاص 6B مثلا لتوضيح الرسمه فى حال ان البودره اتلخبطت و فى الاغلب هتتلخبط

بس خلاص
اتمنى يكون الموضوع عجبكم ويا ريت اشوف نقد ايجابي بناء
 دعواتكم

و السلام ختام