cheese cake

 تشيز كيك 

السللام عليكم

الوصفه دى منزلاها مخصوص لناس عزاز على قلبى طلبوها منى لما داقوها وطبعا عجبتهم عشان كده طلبوها

انا مبقتنعش ابدا بالتشيز كيك اللى على البارد

التشيز كيك لازم يكون مخبوز  دى اصل الوصفه من زمان

دى مقاديرى لصينيه 28 سم وانا بحبها رفيعه كده تقدرو تذودو مقدار الجبنه لو عايزينها اكبر

4 بسكوت مارى صغير حوالى 30 بسكوته  انا استخدمت نص اللى فى الصوره

كوب سكر

3 بيض

1 فانيليا

معلقه زبده

جبنه كريمى

معلقه كبيره دقيق معلقه كبيره نشا

هنحط البسكوت فى الكبه و نفتته و نسيح معلقه الذبده او السمن  و نحطه عليها و نضرب تانى

نفردها كويس فى الصينيه طبعا يفضل لو صينيه بتتفتح من الجنب

انا استخدمت كوبايه  عشان تتفرد كويس و اعرف اضغط عليها

فصلت البياض عن الصفار و فى الكبه حطيت الصفار و الدقيق و النشا والجبنه و ضربت كويس و ممكن ذره ملح عشان التوازن

دى الجبنه

لو مفيش جبنه او قليله وحبيتى تزوديها بحاجه خفيفه  ممكن تضيفى زبادى بعد ما تصفيه كويس

ده زبادى انا عاملاه فى مره تانيه و صفيته من الشرش بتاعه

دى صوره الزبادى فى الكبه عشان تتاكدو بس دى من مره تانيه الصوره النهائيه من غير زبادى مع انها مبتفرقش اى حاجه خالص و لا حتى فى الطعم لان المفروض الزبادى بنصفيه لحد مايكون شبه الجبنه

ده الشكل بعد الخلط

البياض بقى هنعملو مارينج

اول حاجه نستعمل بوله نضيفه تماما 

و نطحن السكر بودره

نضرب الاول شويه اول ما يبقى فوم كده نحط السكر معلقه معلقه و احنا بنضر لحد ما يعمل المارينج

نضيف خليط الجبنه على المارينج و نقلب برااااااحه من فوق لتحت يعنى نقلب بشكل افقى

مش بشكل راسى زى الشاى لا

افقى عشان نحافظ على الهوا جوا

لما يختلط تماما و اللون يتجانس نصبه فى الصينيه

و نفرقع الفقاقيع دى

نحطه فى فرن 180 حوالى 45 دقيقه زى اى كيك و نسيبه يهدى فى الفرن 

وبعد كده نحطه فى التلاجه ساعتين مثلا قبل التقديم هو مبيتقدمش دافى لازم يبرد اوى

التوبينج بحط الفراوله على حبه سكر و نص لمونه على النار يغلو شويه

انا هنا هرستها قبل ما احطها عليه ساعات كتير بسيبها قطع 

وممكن نحط مربى جاهزه بس اللى معموله فى البيت لا يعلى عليها

على فكره سهله كتير و فى كام نقطه احب اذكرهم

اولا ممكن اوى منعملش المارينج ده و نضيف البييض و السكر كامل فى الكبه و نخلط مع الجبنه و نحط فى الصينيه على طول بس انا بحبها تكون هشه من جوه اكتر عشان احس انى باكل كيك مش جبنه 

ثانيا ناس كتير بتحب  تخبزها فى حمام ماء حلو طبعا بس انا محستش بفرق بينهم

ثالثا الوصفه دى بتاعتى لكن الوصفه الاصليه بتتعمل بالجبنه الريكوتا مع الجبنه الكريمى 

رابعا و اخيرا الوصفه دى كده تعتبر الساده يعنى ممكن تضيفو فيها اى نكهه او فاكه اى نوع شوكولاته بتحبيه زى مثلا 

دى بالكراميل نحط كراميل مع خليط الجبنه و نحطه على الوش

و دى بالبرتقال 
نحط بشر برتقال مع ربع كوب عصير برتقال جوه الخليط و نزين بمربى البرتقال 
و زينو كمان بخوخ كمبود معلب وتوت

 دى بقطع شوكولاته من جوه و صوص شوكولا على الوش

دى حطو نص الكيك و زادو كاكاو على الباقى و حطوه فوقه

و دى نفس الفكره بس خلطوهم مع بعض بشكل رخامى
يا رب تعجبكم  و تجربوها 
و دعواتكم ليا 
سلام

اعملى توكه شعر سهله

السلام عليكم

طبعا كلنا منستغناش ابدا عن التوك دى 

مبتخدش وقت ابدا 5 دقايق تكون التوكه خلصانه 

دى جلاليب كانت واسعه شويه و ضيقتها بسيط و الشرايط الرفيعه اللى فضلت من التضييق بدل ما ارميها  عملت بيها التوك

و الصور شارحه نفسها

قفلت الجانبين و ممكن تتعمل يدوى من غير ماكينه

الاول قلبتها على الوش كانك بتدككى استك

و دككت استك عادى

نحاول نقفلها و طرف القماش لجوه عشان متنسلش مجرد غرز بسيطه اوى

و النتيجه حلوة و سهله بجد

 و احسن حاجه ان الجلاليب قطن طبيعى 100% 

يعنى مش هتضر الشعر زى القماش الصناعى

اتمنى تجربوها مش محتاجه مكنه ولا مجهود او خبره 

و هتلاقى تسريحتك اتملت توك

اتمنى تدعولى بالصحه والسعاده

سلام

الكريب

من احب احب الاكلات لاسرتى

و بعد تجارب كتيير كتيير عشان اوصل لافضل نتيجه

لان كل اللى دقتو عندهم او حتى الشيفات فى التليفزيون بيطلعوة تخين كده و مش لطيف

و ان شاء الله يظبط معاكو على طول لما تجربوه

دى المقادير لكميه واحده

2 كوب دقيق 1 كوب لبن  1.5 كوب ماء 2 بيض 2 معلقه كبيره زيت ملح فلفل اسمر حبه سكر

انا عملت مقدارين بس نضيف 2 كوب دقيق كمان اوك 

و نقدر نغير فى مقدار اللبن او الماء براحتنا المهم السوايل يكونو كوبيتين و نص 

يعنى نعمل 2 كوب لبن و نص ماء او 1.5 لبن و 1 ماء براحتكو

احلى حاجه فى الكريب انك ممكن تعمليه باى اله عندك بالكبه  او خلاط الكاس بتاع الطماطم او مضرب كهرباء او مضرب سلك عادى  اى حاجاه

ضفت البيض و الملح و الفلفل و الزيت و ضربت و بعدين ذودت اللبن و الماء و ضربت كويس

و يعدين الدقيق و ضربت كويس اوى اوى

 

و دى النتيجه لازم يطلع سايل خالص زى عصير الجوافه كده شافين المضرب معلهوش حاجه تقريبا لانه سايل خالص

و نسيبه نص ساعه يرتاح فى التلاجه 

انا كنت بستعمله على طول بس سمعت ان نسيبه يرتاح احسن عشان يفرد معانا افضل

دى الطاسه اللى استخدمتها انتو شايفين انها استلس مش تيفال هى مبتلزقش برضو لان ليها قاعده سميكه بتوزع الحراره كويس

براعى انى الاقى حاجه اقيس بيها العجين يعنى مغرفه او فنجان بحيث يطلعو كلهم مقاس واحد لان هنحتاج نشتغل بسرعه فمفيش وقت نظبط المقاس و هى على النار

بدهن الطاسه زيت خفيف اوى بفرشه و اخليها جنبى عشان بدهن بعد كل واحده او كل اتنين 

و اسخن الطاسه فى الاول  على نار من وسط لهاديه

احط مغرفه من الخليط و احرك الطاسه عشان ينفرد على مقاس القاعده ( القعر يعنى ) و الصور موضحه

هنستنى لحد ما تستوى من تحت حوالى دقيقه كده و الوش بتاعها يجمد كلو  يعنى ميبقاش فيه جزء لسه سايل و هنستنى شويه كمان

ونقلبها براحه عشان متتقطعش او تكعبل على بعضها مش هنعرف نفكها لانها  لسه مستوتش

و دى شكلها و العلامات دى بتبقى من سخونه الطاسه فتكون هاديه احسن عشان متديناش علامات محروقه فى البدايه

و ده شكل الوش بتاعها بعد ما استوى

و ادى النتيجه فى النهايه المقدار بيطلع حوالى 10 او 12 واحده على حسب مقاس القاعده

طبعا تتحشى باى حشوه تفضليها اوو تحطى فيها هامبرجر  فراخ كفته سوسيس اى حاجه تحبيها ممكن جبنه قديمه و طماطم كمان و بتبقى تحفه بس متبقاش الحشوه فيها ميا يعنى نصفيها عشان مطريهاش

انا بحب احط جبنه شيدر و طماطم فلفل و زتون و اطبقها نصين او الفها رول و ارجعها تانى للطاسه عشان تقرمش او نحطها فى اله البانينى او الفرن

و ده الشكل النهائى

على فكره صاحبتى بتحشيها لحم معصج و تلفها رول و تحطها فى صينيه و تغطيها بالبشامسل و ترش حبه جبنهو تحطها فى الفرن بتبقى تحفه برضو

فى النهايه